الـــدرب الـــطـــويــــل

ياطير حظك بالجناحين حلقت

للبعد ولقطع المسافات ضاري

لو مطلبك روس النوايف تعلقت

فيها ولو تجري عليك الجواري

لا تشتكي ضيقه ولا ضامك الوقت

ولا فيك هم الا هموم الحباري

وانا على شوك الليالي تسلقت

لين ارجحت هزيمتي بأنتصاري

لو اعلم بغيب الليالي ترفقت

لكن ماغير الله عن الغيب داري

ولاكان نمت الليل كله ولا فقت

لين أحترق زادي على جمر ناري

لا الحظ ساعدني ولا انا توفقت

حتى الزمان اخلف مساره مساري

وغربت وين وليه مدري وشرقت

اطارد الماء في سراب الصحاري

وتسكرت كل الدروب وتوهقت

وعييت ارد ولا اقتنعت بقراري

يالله وانا اللي ماعصيتك ولا بقت

انك ماتجعل مثل ليلي نهاري

لو شفت نو للسعد كان روقت

لكن حتى ما لنوره مواري

كم لي وانا اهوز الدروب وكم انسقت

مع كل درب وكم يطول انتظاري

وين انت ياللي تلتفت كل ماضقت

ماعاد لك حتى مع الناس طاري

العام كنت ارفق براسك الى ارفقت

واصبحت لي في كل شي استشاري

واليوم كنك للمشاهيب لحقت

ولا عوين للزمن بنكساري

ياليت حتى بأتصاالك تصدقت

يمكن يرد من اقشر الوقت ثاري ..